{....مـــزاج FM

السلام عليكم ورحمة الله وبركاته





{... بـُــكـور..!!
[ بُورك لإمتي في بكورها]

يسعد صباحكم جميعاً...حياكم الله ويامرحبآ ويامسهلآ
صباح جديد ويوم جديد ارجو من الله العليّ القدير أن يكون سعيد على الجميع...
سنكون هنا كل صباح.. نصبّح على بعض نذكر الله ونسولف ونوسع صدورنا...
هذا الموضوع سيكون بمثابة برنامج صباحي خفيف ومنوّع يحمل المتعة والفائدة...
ستكون مدة البرنامج ثلاث ساعات ونصف تقريباً أو أربع ساعات كحد أقصى...
الموضوع راح يكون مغلق طوال اليوم ويفتح فقط وقت البرنامج ^_^
يعني اللي يحب يشارك معنا ياليت يصحى بدري ويصلي الفجر ويقعد يحترينا
واللي يحب يتابع البرنامج فقط يمكنه ذلك من خلال مشاهدة فقرات البرنامج بعد انتهاء البرنامج...

البرنامج سيكون مكون من عدة فقرات تتغير بـ حسب { المزاااج } خخخ <<<رحتوا فيها
راح يكون عندنا موضوع رئيسي نتناقش فيه وناخذ أراء الأعضاء فيه وحيكون فيه مسابقة خفيف وحلوة .. وحيكون فيه فقرة للأخبار بشكل عام يعني ممكن خبر سياسي ممكن فني ممكن ظريف على حسب اللي نلاقيه قدامنا ..يعني راح نوسع صدورنا عالآخرررر
وفيه فقرة للإهداءات راح يكون عندنا أنشودة أو قصيدة والأغاني ممنوعة منعاً بااااتاً لأنها حرام

ان شاء الله راح تكون فيه فقرات حلوووة تستحق المتابعة
كما أنه سيتم استقبال ملاحظتكم واقتراحاتكم على ايميل البرنامج خخخخ <<<حركات البرامج
كان من المفترض انه يكون برنامج يومي بس لآنه الصباح عندي دواااام راح يكون كل خميس وجمعة بإذن الله إلا اذا طرى طاريّ <<عاد انتواااا وحظكم خخخ


انتظرونا
سيفتح الموضوع للمشاركة وبدأ البرنامج عند الساعة الساعة السابعة تماماً بتوقيت ساعة جوالي

السلآم عليكم ورحمة الله وبركاته

{ أصبحنا وأصبح الملك لله والحمد لله لا إله إلا الله وحده لا شريك له, له الملك وله الحمد وهو على كل شيء قدير}

اليوم الخميس 20/5/1430هـ الموافق 14/5/2009م
أسعد الله أيامكم من صباحها إلى مساءها
وأنار صبيحتكم برضا وعفوّ الرحمن

برنامجنا اسبوعي (كل خميس وجمعة) ممتع ومفيد
وطبعاً خلاص انتهينا من شرح فكرة البرنامج (يعني لا احد يسأل عنه تابعوا وانتوا ساكتين) <<امحق مذيعة

عاد الله يعينكم باقعد اهذر عليكم ثلاث مدري أربع ساعات بس ان شاء الله راح تنبسطوا معنا...
أول شيء ترى وقسم وحشتوني واشتقت لقسمي ولناسه وترى مابي اكذب عليكم واقول انه كان عندي ظروف ولا شيء...ابد والله ماغير اللعانة مشتغلة شوي
المهم ترى هالفكرة كانت من زمان براسي بس الكسل هو اللي ماخلا هالموضوع يشوف النور غير الحين.. وربي عندي مشكلة هي السبب بكل مشاكلي اني للأسف انسانة مسوّفة جداً..يعني تلاقيني متحمسه لفكرة أو مشروع أو أي شغله وبعدين يصيبني خمول وتسويف وكل يوم أقول اليوم اخلص شغلي ويخلص اليوم وانا ماسويت شيء <<وتتكلمين بعد خخخ
هذي من أكبر عاداتي السيئة والمشيّنة واللي بجد والله اتمنى اني اتخلص منها...(ترى والله قاعدة ادرس طرق التخلص من هالعادة وراح احط لكم بعض الأشياء اللي تعلمتها)

المهم... شاركونا بنشر غسيلكم الوسخ وعلمونا ماهي عاداتكم أو سلوكياتكم السيئة...؟؟

طيب شكلي اليوم باقعد اكلم نفسي لآنه الظاهر المنتدى ماسددوا فاتورة التلفون وانفصل

طيب ماعلينا بنكمل موضوعنا اليوم (التسويف)
تتوقعون وش أسباب التسويف ...؟؟

اممم بالنسبة لي شخصياً... أحيان احس انه لسه مافكرت زيّن بالشيء اللي ابي اسويه يعني اقول خلني أجله شوي يمكن يطلع معي فكرة جديدة ..يمكن هالشيء صار عندي من كثر التفكير بس برضو مو عذر
بالنسبة للأسباب المنطقية :

1- الكسل
2- الأعمال الغير محببة
3 - الخوف من المجهول (كل مهمة إذا لم تبدأ تعتبر مجهولة)
4 - انتظار الإبداع وساعة الصفاء <<هذا زييّ
5- التردد
6- الأعمال الصعبة الكبيرة ..

تابعونا...حتى نرى ماهي الحلول


/

\

/

طيب يا حلوين عندنا سؤال الحلقة وهي صورة مشفرة
حاولوااااااا تتعرفوااا على صاحب الصورة




سنعود بعد قليل

^

الشيخ عايض القرني لبى قلبه

برنامج حلو وصباحي نشيط

اطلق من برنامج هيفاء حق الصبح


التسويف طال عمرك امر وارد

بس للأسف اني حتى مااقدر اسويه بالدوام لاني لو سويته تروح علي

الطيران للأسف يهتم بالدقيقه والاقل وهذا الشئ الي يشغل بالك

الارتباك اول طريق الفشل

بس بعض الاعمال صراحه يجب التروي فيها

يعني لا تكون منطلق على خشتك زي سذر << ياليل

لا يعني لا تكون متحمس ومنطلق واخر شئ انت حتى ما رتبت الاشياء البسيطه عشان تنجح هالشئ

المشكله ان بعض الناس يمغطوووون ويطوولووووون عشان يخططون

وعشان كذا يكسل ولا يسوي هالشئ

ودايم نقول ان شاء الله انها خيره

طيب تخيل لو مهيب خيره وش راح يكون موقفك يالـ %%&#$%& <<

فكرتك روعه كروعه طرحك ووجودك يالدبيه

واكيد بتلاقي صداها هنا وهناك

اهم شئ الزين ما يشارك

برب

اهلاً وسهلاً عزيز النفس برتقاله <<على قول المربوش
حيّـــاك الله والله وجودك ردّ الروح فيني حسيت اني اكلم أحد مو كالعادة اكلم نفسي <<مسكووونة

التسويف طال عمرك امر وارد

بس للأسف اني حتى مااقدر اسويه بالدوام لاني لو سويته تروح علي

الطيران للأسف يهتم بالدقيقه والاقل وهذا الشئ الي يشغل بالك

الارتباك اول طريق الفشل

طيب حلوووو..يعني هالشيء خلك ترتب امورك وتسوي كل شيء بوقته

بس بعض الاعمال صراحه يجب التروي فيها

يعني لا تكون منطلق على خشتك زي سذر << ياليل

لا يعني لا تكون متحمس ومنطلق واخر شئ انت حتى ما رتبت الاشياء البسيطه عشان تنجح هالشئ

ايه صادق بس خليّ سذر بحالها ياخيّ هي مأكله عشاك

المشكله ان بعض الناس يمغطوووون ويطوولووووون عشان يخططون

وعشان كذا يكسل ولا يسوي هالشئ

ودايم نقول ان شاء الله انها خيره

طيب تخيل لو مهيب خيره وش راح يكون موقفك يالـ %%&#$%& <<

كأنك تقصدني...
بجد هذي مشكلتي كان قبل فترة عندي شغلة وفيه ملف لازم ارسله باسرع وقت
والله واقعد اسبوعين كل يوم اقول بكرهـ بس اشوااا بالآخر ارسلته وتم استلام الملف بنجاح

فكرتك روعه كروعه طرحك ووجودك يالدبيه

واكيد بتلاقي صداها هنا وهناك

اهم شئ الزين ما يشارك

الله يسلمك وروعة الفكرة تزداد بتواجدكم الكريم
وبالعكس الزين صاحب الدار حنا الخارجين وهو الباقي <<<الزين لاتشوف حالك علينا

أطلق شبان سعوديون عاطلون عن العمال حملة أطلقوا عليها "وظفونا ولا سفرونا" ، وتحدث عدد من القائمين على الحملة لـ "سبق" قائلين: الهدف الأساسي هو تأمين فرص وظيفية للشباب السعودي في بعض الدول ويكون المسؤول عنها مكتب العمل لأنه أثبت فشله الذريع في توظيف الشاب السعودي بالداخل ولزاماً عليه تأمين عروض خارجية".
وقال عدد من الشبان لـ "سبق" أنهم سئموا من البطالة وكثيراً ما وضعوا في مواقف محرجه مع أسرهم ، وقال آخر رمز لنفسه بـ) م.م.ن) أنه سأم من المكوث في المنزل كشقيقاته ، فطوله لا يتجاوز 163 سم وكثيراً ماتم رفضه من العمل في الخدمة العسكرية بسبب هذا الطول.وأضاف: عشقي هو أن اقوم على خدمة وطني وأن أكون حارس على أحد ثغوره فعمر الطول لم يكن مقياساً للرجولة" . <<ياعمري كسر خاطري والله حسيته يعاني صدق
ويقول آخر:" العمل في القطاع الخاص بالسعودية أصبح شبح بالنسبة للعاملين فيه فليس هناك إحساس بالأمان الوظيفي ، ناهيك عن الراتب الضئيل والحوافز المهدرة وتسريح الموظفين لأتفه الأسباب ."




اتمنى من كل قلبي أن تجد هذه الحملة النتائج المرجوة منها

هآي .. صباحكم سكر / وأحلى خميس لأحلى أعضاء صاحيين من بدري ( اللي سهران من أمس مالو تحية ! ) .. أنا مو سهران

بالمناسبة فكرة نآيس مررة يا بدوية

التسويف ..
أعتقد الأغلبية العظمى تعاني من التسويف .. بالنسبة لي أعتقد إن السبب الرئيسي هو كثرة المهام اللي أحط نفسي فيها وأجبر نفسي على آدائها ..
لما أكون عندي مية شغلة بأسويها ورآسي مليان مشاغل .. هنا ( أتنّح ) وأشغل نفسي بأي شيء تافه الاّ من إنجاز الأعمال الواجبة ..

للأسف عندنا تخبط واضح في تنظيم الوقت .. ماشين في الدنيا بالبركة .. التخطيط معدوم .. شخصياً ما أضغط على نفسي لإداء المهام الواجبة علي ..
ودايما أشوف ناس كثير يضغط على نفسه لما يكون عنده شيء مهم ولازم يعمله .. لكن أنا أشعر ببرود فضيع حتى أمام الأعمال الضرورية جدا كالإختبارات مثلا ،، ما أذاكر الا قبل الاختبار بكم سآعة .. دايما أحط نفسي بمواقف صعبة وأخرج منها عادة من عنق الزجاجة على قولهم ..

الحل .. قريت مقال قبل فترة يقول حاول تنجز أكبر مهمة ضمن قائمة المهام اللي حطيتها لنفسك .. لو حطيت قائمة بـ 5 مهام تسويها اليوم ، يقول لازم تبدأ بالمهمة الأصعب واللي تكرهها ، واللي تحس إنك لو أنجزتها إنك أنجزت أكثر من 50% من المهام .. وبكذا تعطي نفسك دفعة معنوية حلوة لو أنجزتها .. وبتشوف المهام الباقية بسيطة وتتحمس إنك تخلصها أيضاً .. ويا سلام لو تحط خط ( تشطب ) على المهمة اللي أنجزتها .. بكذا تتحمس وودك تخلص المهمة بسبب إنك تشطب عليها زي اللي قبلها وتشوف القائمة كلها مشطوب عليها .. أي أنك أنجزت المهام المطلوبة .. بعد كل مهمة تكافئ نفسك مثلا بالخروج .. بالمشي .. بمشاهدة برنامج تلفزيوني ... ثم ترجع تكمل إنجاز المهام الباقية .. أحلى شيء نطلع منه بهالطريقة إنه تزيد ثقتنا بنفسنا .. ومع الأيام إن شاء الله بنتخلص من هذه العادة السيئة


و سـ لاامــ ـااات

حيّاك الله أمين...ونوّرت المنتدى وان شاء الله تكون عضو دائم للمنتدى ولبرنامجنا <<ترحب فيك لأنك جديد وهي توها تشوفك

الله يسلمك يارب وروّعة الفكرة بيكم انتواااا

مشكلة والله انك تكون زييّ (مسّوف)
وتتكلم عن نفسك كأنك تتكلم عني على قولك حياتنا ماشيه عالبركة

الحل اللي قلت عليه مرة روّعة...وان شاء الله باجرب سويه من بكرهـ <<بداية التسويف

مشكور آمين بين النصابين...وخليك معنا لنهاية البرنامج راح نوزع حلاوة مصاص على المتواجدين خخخ

طيب ياحلوين شفنا ردّ أخونا آمين عطانا حلّ حلووو بس للأسف هو ما طبقوااا
وهذي بعض الحلول العملية للقضاء على التسويف..

1- ضع وقتا للإنتهاء من المهمة ، لا تتركه للذاكرة ، بل علقه على الحائط أمامك
2- خذ على نفسك عهدا ألا تسوف أبدا
3- شجع نفسك وأعطها مكافأة.
4- لا تتردد وابدأ العمل الأن
5- ابدأ في العمل ولا تنتظر الإيحاء فلربما لا يأتيك أبدا


جربوا وأنا راح أجربّ واعلمكم بالنتايج

آمين ماجاوبت على سؤال الحلقة...تعرفت على صاحب الصورة...؟؟

/

\


هذي القصيدة احبها مرة..واحب اهديها لتؤامي المسكونة (امولة)


http://www.youtube.com/watch?v=ue55MajK6R0


وانتوا بعد تقدرون تهدونها للي تحبونه
المجال مفتوح للأهداءات