ماتلاحظون أن الروايات السعودية زادت في السنتين الأخيرة ؟ حتى الشعب أصبح يهتم فيها على غير عادته وطغت على سيرة المباريات الاهتمام الأول للشباب .. لكن قليل اللي يقدر يستفيد من هالفكرة .. مع أن الموضوع سهل ومايبيله ذاك الشغل .. إذا مشيت مع كلامي خطوة خطوة صدقني بتصير غني بأسرع وقت ممكن .. لحد يقول لي طيب ليه ماتطبقها أنت ؟ لأني بكل بساطة ماأبي أكون غني .. المهم خلونا من كثر الحكي وندخل بالمفيد .. أولاً تفتح الوورد وتبدأ بالتعريف بنفسك .. على أنك فتاة سعودية ملّت من تقييد حريتها وبتطلع فضايحها ثم تبدأ بسرد مغامراتك الجنسية مع أصدقاءك وصديقاتك .. ويكفي باليوم الأول تكتب صفحتين ولا ثلاث ثم ترسلها على أكبر قدر ممكن من الإيميلات .. وبعد أسبوع اكتب لهم الجزء الثاني وهكذا .. طبعاً بعد كل رسالة بيجيك آلالف الردود من هالمراهقين ( يشكرونتس ) ويطلبون منتس تستعجلين بالجزء اللاحق .. وراح تسمع الناس حولك يتكلمون عن هالبنت الجريئة اللي تكتب مذكراتها هي وخوياتها .. أنت اسكت ولا تعلّم أحد إلين توصل لآخر جزء واستشير الناس .. هاه وش رايكم لو أطبعها بتلاقي إقبال ؟ طبعاً شي أكيد راح تمنع داخل بلدنا المحافظ لذلك وش رايكم أطبعها في لبنان ولا أشوف دولة أوروبية ؟ وبتجيك آلاف الاقتراحات والآراء والبعض راح ( يتبناك ) ويطبع روايتك على حسابه الخاص .. ولازم يكلمك شخصياً عشان تتفقون على الكيفية والسعر وتوزيع الأرباح .. في هالحالة أنت بتنّكب وتتلخبط .. فمالك إلا تشوف واحد من أخوياك  المتحررين يخلي بنته تطلع أمام الجمهور على أنها صاحبة الرواية والأرباح النص بالنص .. باختصار هذا ماحصل في رواية بنات الرياض ..

موقع قوقل من ِأشهر المواقع في النت وحائز على المركز الثاني عالمياً بعد الياهو ، وأنا أعطيه الأول .. هذا الموقع يقدم خدمات كثيرة جداً ومهمة ومع الأسف أن أغلب المستخدمين مايستخدمونه إلا للبحث و10 بالمية تقريباً هم اللي يعرفون بقية الخدمات اللي يقدمها مثل : الجي ميل ومركز التحميل والقروبات والبحث فيديو والسبيسات والنسخ المخبأة .. إلخ .. وهالعشرة بالمية نصهم مايستخدمونها .. عموماً ماهو هذا موضوعنا .. اللي بتكلم عنه هو البحث .. في قسم احصائيات قوقل تكتب أي كلمة ويعلمك أكثر الدول بحثاً عنها .. وهالخدمة تفيد أصحاب المشاريع التجارية في معرفة أكثر الشعوب بحثاً عن منتج معيّن .. لكن أنا بحثت عن كلمات ثانية وطلعت نتائج طريفة وحاب أشارككم فيها .. أكثر من بحث عن كلمة ( وظائف ) هم السعوديين وتحديداً من جدة ثم الدمام ثم الرياض .. وفي المركز الثاني مصر .. أما كلمة ( تعارف ) فجاءت سوريا في المركز الأول ثم اليمن ثم السعودية .. وكلمة ( زواج ) احتلت السعودية المركز الأول وتحديداً الرياض ثم جدة ثم الدمام .. وكلمة ( مسيار ) كانت النتيجة كالتالي : السعودية ثم الكويت ثم قطر .. ومن الطريف أن تحتل السعودية المركز الأول في البحث عن جملة ( أسئلة اختبار ) وبنسبة كبيرة جداً تليها مصر بنسبة ضئيلة ..( ياحليلنا نبي أسئلة الاختبار ونتزوج مسيار ) .. في المقابل تأتي السودان في صدارة الدول التي تبحث عن ( الهجرة ) تليها المغرب ثم ليبيا .. أعتقد المقصود بالهجرة إلى دولة أخرى ماهو التقويم الهجري .. عموماً القائمة تطول وسنكملها في عدد لاحق إن شاء الله .. سلاااام ..

 ردود سريعة:  الأخ ( دمامي قديم ) مشاركتك رائعة .. وإن شاء الله تعرض في عدد قادم ..
* الأخت ( صوت الرحيل ) رسالتك قصيرة جداً .. في المرة الجاية اكتبي واجد ..
* ( عظيم الحب ) لم يتم عرض موضوعك لضيق المساحة ولكن إن شاء الله بيكون أول موضوع في العدد القادم .
* ( coolaziz ) شكلك فهمتنا غلط .. نقصد بإرسال مشاركة يعني كتابة موضوع زي اللي فوق .. مو تكتبلنا سؤال للعدد .
* ( شهيب ) عندك الإهداءات اكتب فيها هالكلمتين .. أما تبينا ننزلها هنا .

سؤال العدد : في الصورة التي بالأسفل .. إلى أي جهة يتجه الباص ؟ ( ملاحظة : هذا السؤال طُرح على طلاب أولى ابتدائي وكلهم أجابوا صح ) ..

للإجابة على سؤال العدد أووكبس [ هنـاااا ]

سؤال الحلقة الماضية : الليمون مايمباع بعد صلاة العصر ليش ؟
* الإجابات :
* الشقراويه : امم اتوقع والعهده على مخي .. انه ماينباع بعد العصر يعني اذا عصرناه وخلصنا وش بقى عشان نبيعه <ـ كيف الذكاء !! . ( خطــأ )
* خرمانة قهوه : اصلا صيغة السؤال غلط .. المفروض يكون ليش اليمون ماينباع بعد العصر .. والاجابه لاننا خلاص عصرناه . ( خطــأ )
* الزين بالحيل : انا اقول محسن اكبر لأني اعرفه شخصيَــن .. خخخخ الين الحين وانا بقليبي السؤال اللي قبل بس الله العالم ما يبيعون الليمون بعد صلاة العصر عشانهم يتسننون والا انهم يبيعون برتقال والا عشان الليمون خلص عندهم بس منهم اللي انت تتكلم عنهم اخبر كل محل خضره يبيع ليمون وكل مطعم يعطيني ليمون وبسكّــر بعد بس يمكنهم ما يبيعونه عشان رمضان .. اختر الاجابة الصحيحة . ( خطــأ )
* أبو عرادة : لان الليمون صار عصير خلاص ومافي احد يشتري قشور ليمون . ( خطــأ )
* سهرات : طبعاً ما راح تبيعه ليمون لنك عصرته ..بس تقدر تبيعه عصير ليمون ..الا الكاس بكم؟ لوووووول .  ( خطــأ )
* مدمن صرقعة : ماينباع الليمون عقب العصر علشان الناس جايه من الدوام تعبانه وخبرك صيام وتعب علشان كذا يصكونها نومه الين المغرب وبعد المغرب يشترون ليمون . ( خطــأ )
*وأنا اخت فريال: جواب سؤال العدد والملحقيه الثقافيه للعقول العربيه ..تنميتـ"ن" وحضارتن وعنفوانية ..والله العالم انه خلص بعد صلاة الجمعه  . ( خطــأ )
للمرة الثانية على التوالي لم يصل أحد للحل الصحيح .. فيه فرق بين أنك تقول : السؤال غلط وقولك : من قال إن الليمون مايمباع بعد صلاة العصر ؟ .. والإجابة الثانية هي الصحيحة مبروك لي وحظ أوفر للجميع