يقولون ان بعض التغييرات الزغنطوطه قد تحل مشاكل جمّه ،، يعني مثلا احتمال لو ترفع عن الارض علبة عصير فاضية تساعد في حل مشكلة الاوزون (اللي مخترعينها امريكا عشان يقولون تروا تبطون توصلون علمنا << خابز حركاتهم ) ،، ومعروف ان حنّا يالعرب (الدواهيه) مافيه امل نتفق على شي ،، خلافاتنا حتى على صحن الرز ،، في محفظتي اقتراح يعتمد على المبدا اللي قلته في اول كلامي (حق علبة البرندا والاوزون) حركه صغيره لو سويناها ،، ممكن والله اعلم تكون هي السبب لحل خلافاتنا الازلية (لحد يضحك) يعني اقول فرضاً لاقدر الله يعني وشرايكم لو نسحب على كلام ابو سيبويه والدؤلي ،، ونمسط بموسوسين اللغه على جمب ،، ونتفق على اعراب موحّد لهالحروف الغبيه اللي اذتنا فاواخر الكلمات ،، ضماير متصله وشي مهب متصل وحروف علّه والف ابواثنين وواو الجماعة (الله يمسيهم بالخير) وباقي هالشغلات اللي مدري وشتبي من الحياة ،، يعني اقول وشرايكم لو نعطيها اعراب واحد ونسميها (حروف التقفيله) -يعني اللي تجي باخر الكلمات وتقفلها - ماتدرون ممكن سبحان الله تكون سبب في توحيد كلمتنا وحل لخلافاتنا ،، مع تحيات : واحد حامل مقرر (102عرب) .
 

تسان بتجينا الزلال فهي بسبهة هالحريم الله يهديهن ولا ياخذهن عنّا .. قبل كم يوم كنت رايح للعطار أجيب قهوة مطحونة .. وأنا في الطريق أقول ياولد الحين العطارين وشهوله يستاجرون محلات .. كل اللي عندهم قهوة وزعفران وإذا واحد فسقان يجيب علك مستكة .. ذاك اللي إذا أكلته ثم شربت موية يصير طعمها تسنك تشرب فقس .. يعني لو يحطها في بسطة أصرف له .. المهم وأنا أمر من عند هاك العطار وأشوف البنات من ورى القزاز .. قلت بس خلنا نشتري من عنده ( سعودي ) .. يوم دخلت لياهن متزبرات فالكورنر وكلهن يتكلمن مدري من اللي يسمع .. وأسولف مع أبو هنود أسأله عن الأسعار وأكاسر معه .. لين راحن البني .. وأنا أروح لمكانهن اللي كانن فيه .. لعل وحدة ناسيتن حاجة ولا طايحن منها شي .. ثم قلت خل أشوف وش كانن يتفرجن عليه .. من بعيد أشوف العلب أحسبها عسل .. طلعت خلطات وأدوية .. خلطة أم علي لتصغير الخشم وخلطة أم فلان لتكبير الأذن .. شغل دجالين .. مايصدقه بزر .. وماقهرني والله إلا خلطة لتكبير ( .... ) حاجتن ماتوقعت أحد بيكبرها .. لأنها تسبيرة خلقة في السعوديات .. لا وفيه واحد من الصناديق مكتوب عليه علاج السرطان بكافة أنواعه !! وشهوله أجل فاتحين هالمستشفيات دام عندك العلاج ياتسبدي ؟ .. الأماكان هذي يبيلها مراقبة من البلدية ووزارة الصحة .. والهيئة بعد ..

 هذي رسالة وصلتنا من العضوة نجمة عنيزة : السلام عليكم .. انا عضوه جديده مثل ما انت شايف وبصراحه ابي اعترف بشي دام احنا بالبدايه وبدون مقدمات انا انسانه مريضه نفسيا وعندي مرض اسمه رهاب المرتفعات وعشان هالعله اللي فيني صرت اخاف اطلع من البيت وانغمست بالنت واعجبني منتداكم وبقوه وسجلت معكم ولكن المشكله ماهي هنا المشكله اني ومن رهاب المرتفعات دايم اتهاوش واتناحر مع الاعضاء وهالسالفه سبب تركي لمنتديات كثيره وبعض المنتديات طردتني لاني وبكل صراحه اغلط بالكلام على الاعضاء وهالشي تعالجت منه بس صعب اتخلص منه ويجيني بين فترات واخرى وانا حبيت انبهك بس وعشان تتجنب المشاكل وبعد عندي مشكله اصغر من اللي راحت وهو اني اعشق وبجنون اختراق المنتديات واتمنى اترك هالطبع السخيف وياليت تساعدني اذا تقدر واكون من الشاكرين قبل اتهور واخترق موقعكم والسر في استطاعتي على الاختراق امي تقول اني مسكونه مدري هل هي تخوفني والا تبي تعقدني والا صح لا اعرف اتمنى تتحملوني واذا صار مني شي على طول اطردوني وماراح ازعل منكم أنا قلت لك لأني خفت من محسن لوكيشن وخفت يطردني.. تكفى شالحل؟!!

* الحمد لله إلى الآن ماصار منها شي .. عاد ادعوا لأختكم أن الله يشفيها .. ولحد يتقاشر معها .. ترى الجني اللي فيها هكر محترف .. يقولون عنده أربع لغات برمجة وكم شوكة وملعقة لزوم الاختراق .
 

سؤال العدد : الليمون مايمباع بعد صلاة العصر ليش ؟

للإجابة على سؤال العدد أووووكبس [ هنـــــاااا ]

سؤال الحلقة الماضية : ملكع والحنون أصدقاء ، ومحسن أخو الحنون الكبير ، ملكع أكبر من الحنون ... من خلال هذه المعطيات أيهما أكبر محسن أم ملكع ؟
* الإجابات :
* نصابة على خفيف : يقولون محسن أكبر . ( خطــأ )
* أنـ؟ـا : ملكع أكبر من محسن لكن محسن أقوى . ( خطــأ )
*أهز وماأنهز : اممم اتوقع قد بعض .. يعني باختصار ملكع هو اللي رايح يخاوي بزران . ( خطــأ )
* سميحه المليحه : محسن أكبر من ملكع إذا كان الحنون وملكع أصدقاء والبلوغ مهب بس بالشنب . ( خطــأ )
* سرمد الليل : أكيد محسنوه الكبير .. محسنوه من الله خلقه وهو كبير هههههههههه .  ( خطــأ )
* خرمانة قهوه : أكبرهم الحنون .. بعدين محسن ..بعدين ملكع . ( خطــأ )
* ســاره : قد بعض .. اول مرة اجاوب ياويلكم تفشلوني . ( خطــأ )
* فاقعـ الجمال ـة : يوقفون جنب بعض واللي اطول هو الاصغر بس الوهقه ان تسانو طول بعض <<< وش دراني عنهم مخلفتهم وناسيتهم ( يارب صح ) . ( خطــأ )
* محسن0لوكيشن : أنا أكبر مايبيلها سؤال .
* ملكع : ^^ يخسي اللي فوق .. التسبير الله .
* الزين بالحيل : المفروض ملكع اكبر لأن لو كان محيسن اكبر كان صفق ملكع وقال ليش تماشي اخوي وانت اكبر منه. بس للأسف المعطيات تقول ان محيسن اكبر ومع كذا خايف يطق ملكع ياشيخ لو بين ملكع والحنون شهر كان صفقته على هالشهر . ( خطــأ )
* سهرات : امممم ملكع ؟ . ( خطــأ )

مع الأسف الشديد لم يتوصل أحد للإجابة الصحيحة .. الإجابة الصحيحة هي أن المعطيات غير كافية ولايمكنك معرفة من الأكبر من خلالها .