phpMyVisites | Open source web analytics phpMyVisites

 

المنتــــــــدى من هـوونا
آخر تحديث : اليوم 1428 - شهر جولاي (داخل دورة انقليزي ) 2007
مهوب إشاعة...
زاوية يكتبها مصدر مسؤول سميك المستوى في كل أسبوع > البتاع

مع بداية العطلة الصيفية اختفوا وزراء نصب .. ( وهج ) طالعة للديرة تحيي عروس هناك .. وتقول إن جاز لها الوضع بتطوّل ، ( ومدمنوه ) طالبينه بفلم رانبو الجزء الأخير عندهم مشهد خبيتي ويبون واحد يستنزل .. أما ( أبو برغش ) خابرينه عاطل من يوم تخرج إعلام .. قدّم على الديوان وقالوا له انتظر لين يموت مذيع نحطك بداله .. وهالأيام أسمعه يقول مشغول وعندي دوام .. الظاهر حصّل كبينة يعبّر حاله فيها إلى مايطلع اسمه في الديوان ..

 
 
الكاتب : آآآ بوردقا
 أعضاء من أيام السراويل الوسيعة من تحت
مجنوونوووه << مجنون تفحيط وعميد الصور سابقا .. ومبيد البطات في كل الاوقات يعود الينا مجددا .. الرجال حاط صوره واحد منعم ومظبط دقنه .. الظاهر ترك عنه الدشره وصار من هواة التميلح وترويج الحنان .
مــــزاجـــيــه << اذا هي اللي فباالي جت ونصت منتدى البتاع .. واول رد لها شوي وتصك محسن كف بس كان دشير واقف معه واستحت منه خخخخخخ .
نجمة عنيزه << هالمغبره عفا الله عمن ردها الينا جت ولاحدن درى عنها ونزلت لها روايه صاروخيه بالصدز والصراحه حتى مدري هي خلصت والا باقي ؟ نطلت لها كم رد هنا وهنا .. ثم نزلت لها هاك الموضع بالدجه .. لايفوتكم بس .. تخليك تحمد ربك انك سعودي .. نجمه لعد تروحين مب عشان عيونك الحولا .. بس هاللي حاطه صورتها تلمح لي من زمان   .
روعة أدم<< حشاش وسكير سابقاً .. الرجال شكله اعرس وحرمته سحبت عنه الكيبورد .. قام يكتب باوراق وينزلها .. ومغير اسمه بعد عشان ماتدري عنه .. حتى الرجال يقولون تغير وركد ومعد ينمزح معه مثل اول وشراله كراون فكتوريا .
صافي الرحيق << ذي مطلعين عنه اشاعه يقولون انها قديمه بس متغطيه بستار هالنك
.
خراط1000 << جا يسلم على خويه حشاش وانحاش .
00بـنت الـفــهـــد00 << هه قفطناها تويق من فوق سور المنتدى
..
سيده شابوره << ذي قاطه بس .. حالفه ماتبيع عليّ شابوره لين اصورها باللقاء << لايفوتكم بس بروفايلها .
الكاتب : سوير اللي بلوست 
 اذهب إلى الجحيم

وأنا صغير كنت مدمن أفلام أمريتسية ..طبعاً ماعندنا إلا ( غصب1 و 2 ) يجيبون الأفلام ذيك اللي ساكنين بالريف وفي وجيههم حبوب .. المهم مرة وأنا أتابع فلم ويجي الشرطي يشوّت أبو شعر أصفر وهو يقول ( فك يو ) وأنا ألقط الترجمة ( اذهب إلى الجحيم ) .. كنّا في العطلة يعني مايمديني أكشخ فيها قدام استاد الانقليزي .. المهم حنّا كل أسبوع تسذا أبوي ياخذنا للبر عند الغنم ويشتريلنا بباسي وهمبرقل في الطريق عشان ناكله بعد مانتعب من اللعب ونجوع ، أول ماوصلنا رحنا بعيد شوي عن الرجال ولعبنا مين يحفر أكبر حفرة .. وبعد مانخلص نحط مويات صحة داخل الحفر وندفنها عشان لاجينا المرة الجاية ندورها ونشربها << شغل حضارم .. واكتشفنا لاحقاً أن هذي الطريقة اللي يزبطون فيها العرق .. المهم يوم تعبنا من اللعب رحنا ناكل الهمبرقل وتزود وحدة عاد قال أبوي رح عطها الهندي ، أبو الشباب استانس يوم شاف العيشة قال أيش هادا لحم ؟ قلت هازا لحم بقر كويّس سيم سيم غنم ولا أبو هنود قمط وجهه صار تسنّه جون لوك يوم شاف أبوه .. ويحط الهمبرقل قدامه ويقعد يصلي عليها التسلب طلع من اللي يعبدون البقر يوم خلص ويدفنها وهو يبتسي ويقول لها هادا نفر سعودي مافيه معلوم بليز مافي سوّي مشكلة .. وأنا أمسكه علي جمب قلت تعال الله يهديك .. هازا مايصير .. لازم تعبد ربك .. ترى إذا ماصرت مسلم بعدين تروح ( فك يو ) .. ماقلت هالكلمة إلا والرجال حاط رجله الظاهر يحسبني أقردن فيه .. وأنا أروح لأخواني وأسمعه من بعيد يقول تبّني نني ماذر جوتيا .. يوم علمت أخوي السالفة قال لي مجنون أنت ؟ هذي معناها كذا وكذا .. أشوا ماقلتها قدام الاستاد .

الكاتب : إمخبــل  
 الطغس الجوي

* غطت موجه عنيفه من الـ(عج) والـ(غبار) على ارجاء المنتدى .. وكان سببها ان (تلقف) البتاع محسن لوكيشن وقام يتعبث بايميلات الاعضاء .. وصرف أم السالفه انه يبي منهم مشاركات غير معروفة المصير وتسببت هذه الموجه في هطول بعض الاعضاء المغبرين على المنتدى خلال الأيام الماضيه .. منهم (افرست) (الزلابه) (سوالف ليل) (سكود) (مجننهـ161ـم) وغيرهم واللي نطل كل واحد منهم علينا على مشاركه مشاركه وانحاش
 

 

 

 

 

 

 

 

  صندوق الوارد لنصب قولدن .. اللي نظره 6 على 6 يعرف كم رسالة فيه

الكاتب : رئيس التحرير اللي يتتن
 صندوق بريدنا

 نعتذر عن تغيير سؤال العدد لهذا الأسبوع لأن الأجوبة تسرّبت أبد ثانوية عامة ماهي مسابقة ترفيهية :هاه: ..

سؤال العدد الجديد : ملكع والحنون أصدقاء ، ومحسن أخو الحنون الكبير ، ملكع أكبر من الحنون ... من خلال هذه المعطيات أيهما أكبر محسن أم ملكع ؟ ( ملاحظة : محسن مابعد طلع له شنب وملكع شنبه إلى أذانه .. ويتتن بعد )

 

 كل عضو مسموح له برسالتين في الأسبوع ، وحدة للإجابة ووحدة لإضافة مشاركة .. ترى اللي يرسل أكثر من كذا بيتم إهمال رسايله كلها .

للإجابة على سؤال العدد أووووكبس [ هنـــــاااا ]

تبي تشارك معنا في المجلة ؟ اضغط هنا واكتب مشاركتك بدون مقدمات ، وفي آخر المشاركة اكتب الاسم اللي تبي المشاركة تنعرض به  .

 

الكاتب : راعي مسابقات وسواليف
 إجابات سؤال العدد السابق

سؤال الحلقة الماضية : عندك 4 جزرات .. وتبي تقسمهن على 3 أرانب .. بس بشرط ! أولاً : محد ياخذ أكثر من الثاني .. ثانياً ماتقطع ولا وحدة .. هاه وش الحل ؟
* الإجابات :
* افلاطون نصب : اعطي الاول (جزرة وحده) والثاني (جزرتين) والثالث(جزرة وحده) بكذا ماحد اخذ اكثر من الــ(ثاني) الجواب الثاني مادري وشو ^_^
. ( صحح )
* سميحه المليحه : بعد مانوزع على كل ارنب جزرته .. اللي باقيه .. كل واحد يعرم منها عرمه إلين تخللص ويصير تعادل هع  . ( صحح )
* الـزلفـاوي : الحل << جا ببالي مدرس الحساب 
..ياطويل العمر الارنب الثاني دب كنه دشير لازم ياخذ جزرايتين << عيت تطلع خخخ .. والباقين شحليلهم على وحده وبكذا الثاني اخذ اكثر . ( صحح )
* الدب الأكبر : اعطي كل واحد جزره .. والباقية أخلي أخوي يقطعها 3 أجزاء وأوزعها عليهم .. وبكذا ما أكون أخليت بالشروط
. ( صحح )
* أنــ غير ــا : اعطي كل ارنب وحده وتبقى حبه اخذها انا وشرايكم بالذكاء
. ( خطــأ )

المدرس اللي صحح الإجابات اليوم ذمته وسيعة .. جايبينه من مدرسة أهلية .  

صفحات سابقة : 1 ، 2 ، 3 ، 4 ، 5 ، 6 .