phpMyVisites | Open source web analytics phpMyVisites

 

منتديات نصب لوكيشن

     
 
آخر تحديث : مطلع السنة الميلادية الجديدة ( 2009 )
 
مهوب إشاعة...
زاوية يكتبها مصدر مسؤول سميك المستوى في كل أسبوع - محسن }
 

اللهم لا حسد ..
الشهر اللي راح شهر الجوايز على أعضاءنا ..

زووم اخذت كاس علشانها سوّت طابع تذكاري لدولة قطر عن غزة .. حطّت صورة مزنه وهي تبتسي وخلت قلم وردي تلوّن دموعها بقلمها الأحمر اللي تقولنا إنه وردي .. وتيك توك صارت مشهورة وطلعت بالتلفزيون وجلست تمدح في نصب إلين قفلنا التصفح عن القطريين من كثر اللي جوّ بيشوفون وشو نصب
و
الزلفاوي أخذ المركز الأول مكرر في الكلية التقنية مصوّرلهم شعيب ونخلتين ماكلتها الشمس وعطوه لابتوب وهاردسك وماوس وسماعات وطابعه ليزر
و
الزين بالحيل فاز بكرتون فاين علشان فلل بنزين سيارته
.. مبروووك وعقبال ناخذ جايزة نوبل لأكبر تجمّع دشير على الإنترنت

الكاس حق زووم
الكاس حق زوم وتلاحظون صورة مزنه بالنص (ياشينها)
صورة جانبية لجايزة الزين
الجايزة حقت الزين

 
 
 
n9b Generations
المؤرخ: شريـر للأبد.. }

جيلن بعد جيل
نصب .. هذا الموقع القوي مااره مرره
يثبت دائما انه يمرض ولايموت
مات الرعيل الاول من شلة تست تو وآل باحيل وكذكذ وغيرهم من المعتوهين (تراه يقصد العتاهيه )
فطلع علينا رعيل ثاني من اشكال محسنوه وملكع وخرمانه (قنبوله) وباقي الملاحيس (هذي مقصوده )
وسطروا لنا قصص وعساطير خالده في كرتون التب تونتي .. وكانوا سبب في تحقيق الموقع لبعض الارقام المميزه في عالم النت والحضور في القنوات الاعلاميه
همن انبثق لنا رعلول ثالث .. -نقدر نسميه الرعلول الوردي- لان اغلبه كانوا بنات مزنه وإبدويه وكرمل وباقي اللسته (للمزيد .. ادخلوا المنتدى خخخ ) ولايهون ابوزلفاوي وال عزيّز والمربوش وباقي عيال الدكه احبكم يالسنايديه
فللله درهم من رعاليل
وبعد فتره طويله من التذبذب مابين النشاط والركود..
بدا يطلع رعيل جديد + جثث ورفاة من الرعاليل القديمه (قايل لكم نصب مايموت خخ )
كلنا شفنا ارواح (الزين باحيل) و كذكذ ووالقطريه لمعه تحوم بين المنتديات
وشفنا اعضاء توهم بالمصاصة ينافسون بقوة على لقب (اطلق عضو)
الجدير بالذكر ان بين جنبات هالموقع الكثير ممن انظم له وهو فرفور بالثنوي .. والآن اللي تخرج واللي توظف .. ومع ذلك لايزال متواجد
<< عالم فاضيه صحيح خخخخ
الزبدة .. هنيئاً لنا بنصب .. ولنصب بنا .. والله لا يفرقنا
ملاحظه : لحد يقول وين اسمي ! والا ليش تحطني مع الجديدين وانا قديم او العكس ! .. لححححد يدقققـــققق

   
   

عندما تقعين ضحية تحارش المجتمع ؟

الكاتبة: البنت التي كويسه.. }


بعد العملية ..
يمنع من قرائته القصر اللي بعدها بديهتهم لم يكتمل نموها - ماودنا نفتح عيون بنياتنا على مواضيع مثل ذا ونبلش بهجماتهن المرتده .. -
عزيزتي الكمخة لا تجعلي سباهتك بالحياة تجرك الى ماهو العن مما كنتي عليه .
فإذا تسنتي متوذيتن من خنفارك وماجازى لك شكلهن وتهيئ لك انها كهوفن كبيره وتخرعتي منها ..وبها من الشعر ما يعزز من توحشها ...فاكثري من التسبيح وتأكدي أن ثوراتك قد تؤذيك اكثر ان اقدمتي على تعديلها ولمن تعاني من صغر شفايفها
وودها لا حطت روج يبين عليها اتمنى من صميم قلبي تهجد ..من زين الطبايع شاريتن روج من ابو ريالين وقارصك قلبك الا غصب يبين ..
..يا خلفهم خلي عنك السيكون والجليكون والفرتزون ياما شفنا ناس وبدون تحديد بعد التعديل اشكالهن ماانزل الله بها من سلطان..
ومارسمت يوضح احد ضحايا نكبات التجمل ..وجهن ملخبط من كثر الحط والشيل فيه ..حتى الملامح مهيب
عارفتن تحدد موقفها من التعابير

 
شاعر المليون
شاعر المحاورة: كريزي }
ترى مكتوب قولدن ورى علشان محد يسرق الصوره خخخخ
في نصب لوكيشن بقـول القصيـدة
وهي القصيدة بغير هالنصب ماتكون
ودي أغـرد فيـه باحلـى  نشيـدة
لأني بحبه صايرن حيـل  مجنـون
في منتدانـا بتلقـى فوايـد عديـدة
وأعمالنا فـي المنتـدى درّ مكنـون
وبعد لنـا نظـرات كبـرى بعيـدة
من دون ذكر لهـا وانتـم تعرفـون
وفكـرة مجلتنـا فكـرة  سـديـدة
يا جعلها تبقـى وتشوفهـا  عيـون
     
 
بالشكر تدوم النعم
الكاتب: وشلون مغليك }

احترت ..! فكرت..! اكلت تبن ونغفت..!
عن ماذا اكتب .. عن فلسطين المحتله .. عن غلاء الأسعار .. عن احوال الفقراء والضعوف .. فيه احد معه سلف لو يعطين لي شيشه يجيب لي عشره
مواضيع كثيره تدمي القلب بس المشكله لحظات تخطر على بالنا نتذكر مصائب غيرنا وبعده ننشغل بحال أنفسنا ليش ابن ادم ماعندك أحد صدق والله ما يملى اثمه إلا التراب وان حصل تحط معه شوي سمنت على الأقل يطلع منه بلكه شي نستفيد منه .. كثير تنظر لحالك عايش بنعمه وساتر على روحك ومع هذا كله لا نشكر .. كم منظر قدامي واحد بسيارته ياكل برقر ياجعله تنشب بحلقه  ، يبقى شوي منه ويالله مع الدريشه


هdالحمدلله والشكر يارب على نعمك الظاهرة والباطنة

 نويت اهستر بموضوعي بس المشكله اني اكتشفت مافيه ولا كلمه توقف معي او اي كلمه جديه طالعه من القلب
متى اخر مره رفعنا ايدينا بعد وجبه دسمه وشكرنا الله .. ما تسمع إلا تغره والثاني يلعن وراه الملح شوي واللي حبيب وتقول عنه مطوع يقول اكرمكم الله
يانااااس مع الشكر تدوم النعم ... اوقات كثير نشوف حال ناس اكبر منا ونسخط على حالنا لكن لو فكرت وشفت اللي اقل منك رااح تقتنع
اسأل الله ان يرزقنا القناعة وان تدوم علينا هذه النعم ...

 
الإعجاز العلمي في القرآن الكريم
الكاتب: صاحب مبدأ }

بسم الله والحمد لله ،،
قال الكفار المشككون في الإسلام ، إنكم تقرؤون في القرآن أن الحديد منزل ونحن نستخرجه من باطن الأرض
وهم يقصدون قوله تعالى: ( وأنزلنا الحديد فيه بأس شديد ومنافع للناس ).
وكان رد علماء المسلمين في العهد القديم أنهم يؤمنون به كيف ما كان.
وفي العصر الحديث اكتشف علماء الغرب تفنيد رأي المشككين ، حيث أن الحديد لا يتكون في باطن الأرض وأن الشمس على شدة حرارتها لا تكون ذرتين من الحديد ؛ وأن الحديد يتكون في نجوم ملتهبه في الكون الفسيح ، ثم ينزل على الأرض على شكل ذرات ومن بعدها يتجمع في باطن الأرض بفعل الحرارة ، وبعدها يستخرج من باطن الأرض .
سبحان الله وتعالى عمّا يصفون
.

   
 

 

 
أوووه يـالاخــدرر..
  الكاتب: شريـر للأبد.. }  

  يشره الكـثيـر من الـناس على هاللي يـطـلعون بالجـرايد يشـجعون الـمنتخب السعـودي من الجـنـس الناعـم (مع تحفظي على هالكلمة)
ولا يـدرون هالمـتحمـسين ان هالمـسيـكيـنات ما جو الا عشـان يترزقـون الله ، بدل دورانـهم بشـوارع المعـارض وماشـابهه <
واحد حده البحرين خخخ
يعني بلاش حركات ذكـوريه وهـياط يااصـحاب الاقلام ..
يقـول لكم المثل .. ئـطع الارئاب ولا ئطع الارزاء
 عـسى الله يصلـح كـل فاجره وعاهره .. والا يـاخـذها ويفـك العـالم منـها < دعوة شيـّـاب

لبى تسبدي بس آآه<< خخ طلع على حقيقته

وجه يلقّ .. ويدين عبده .. حسبي الله على [وجوه] معد عرفنا من هالمكياجات الزينة من الشينة

 
لقطات حصرية
المصوّر المخضرم: الزلفــاوي }

هذي صور ماشفتوها .. بس على نصب قولدن

- اضغط على الصورة لتكبيرها -
لحظة شاعرية لرجل حالم والملاك الحارس جنبه في وسط بستان من النوّار البرّي .. أصير قوطي لعيون الحب

- اضغط على الصورة لتكبيرها -
يحبني .. ما يحبني .. يحبني .. ما يحبني
وجع طلع ما يحبني
!!
هات ورده ثانية .. إلا غصب يصير يحبّني

{ نكمّل باقي الصور العدد الجاي }

إجابات العدد السابق
مكتب المحررين تحت الدرج .. يمين }

سؤال الحلقة الماضية الأول : عندنا خمس برتقالات وكيسين ... إلخ ؟ ( السؤال كامل في الصفحة 11 )

* الإجابات :
الليدي مزنة : نحط الكيسين داخل بعض . ( صحح )
عكـgggش : احط كيس بوسط كيس .
( صحح )
البـدوية : أنا أول مرة أشارك معكم يعني راعوني شوي .. اقول وين ذاك المدرس ابو ذمّة وسيعة ؟ خله هو يصحح اجابتي خخخ .. بما انكم قلتوا ان الاجابة منطقية .. فالمنطق يقول انه حط الكيسين بوسط بعض..وحط الخمس برتقالات بوسطهم..وبكذا يصير حطينا الخمس برتقالات بالكيسين بدون ما نطلعها من كيس للثاني...<< فديتني على هالذكااء
( صحح )
اسلوبي : نحط البرتقال بالكيس ونحط الكيس وسط الكيس الثاني وقضينا.. هذا طبعاً الجواب المنطقي
. ( صحح )
قصيميمه :
نضع الكيسين داخل بعض ونضع الخمس برتقالات فيهم . ( صحح )

   
سؤال العدد
مدير التحرير: أبو تتن..-يقولون تطوّع خخ}

ملك الهند والسند ذيك الأيام .. حتى شوفوا عيونه زرق

يقول لك أحد ملوك الهند والسند وبنقلادش نذر إذا جاله ولد بيخفف نص المحكومية عن كل المساجين في بلاده .. وبعد كم سنة رزقه الله بولد .. فأمر بتخفيف العقوبة على المساجين إلى النصف يعني اللي محكوم عليه عشر سنين يصير خمس .. واللي أربع يصير ثنين .. فقال له الوزير .. يافخامة الرئيس وماذا عن المحكومين مؤبد ؟ ففكر الملك ولم يجد إجابة وهو الآن حزين لأنه لو ما حصل طريقة لهم بيصوم ثلاثة أيام كفارة .. والرجال مايصبر عن الأكل ..
( ساعد الملك في إيجاد حل للمؤبدين ) .

جايز لي هالهيلاهوب اللي لابسه خخخ

للإجابة على سؤال العدد { اضغط هنا }

   

عظيم الحب : ياخوي اترك التتن .. الجواب اعتقد اجابته والعهدة ع الراوي .. انه نحط كل ابو الكيسين في بعض عقبه نحط الخمس برتقالات .
الزين يايكمل : ندخل كيس بوسط الكيس الثاني همن نحط البرتقالات بوسط الكيسين فهمت .. يعني زي لارحت للبقاله وشريتلك علبتين ببسي أم اربعت أريل وحطيتهن بوسط كيسين عشان مايتشقق الكيس ويطيح الببسي ويغدي طشيش همن يخرب العشاء .
( صحح )
أفلاطون نصب : نحط كيس وسط الكيس ونحط البردقانات الخمس بوسط الكيس وانتهت المشكة . 
( صحح )
جمرة غلا :
ندخل كيس دآخل كيس ونحط البرتقآل صووح علي . ( صحح )
البرد الحار :
مايبي لها تفكير حط البرتقال في الكيس الاول بعدين حط الكيس الاول في الكيس الثاني <<<< بالتفصيل من زود الثقه . ( صحح )
سهرات : بكل بساطه حط كيس داخل الثاني وبعدين حط داخلهم البرتقالات .
( صحح )
الزين بالحيل : بساعدكم بالحل بس اخر مره تجون تسألوني يا حقين المجلة .. تراكم غثيتوني .. كن ما فيه حلال مشاكل في هالدنيا الا انا
.. الحل : تشتري خمس برتقالات ثانية وتحطها بالكيس الثاني ولا له داعي تشيلها من كيس وتحطها بكيس ثاني خخخخخخخ .. امزح لكن خذ الحل .. انك تحط الكيسين في بعض وترص الخمس برتقالات فيهم . ( صحح )
دب بس يعجبك : اتوقع نحط خمس برتقالات بكيسة وبعدين بسررررررعة على طول يعني .. باسرع من لمح البصر (المفروض تعطوني جائزة على لمح البصر ذي) ايه اقول بسرعة مرة مرة نشيل البرتقالات ونحطها بالكيسة الثانية .. بدون ماتنتبهون ههههههههههه بالله مهوب جواب منطقي؟؟ الصزز الصزز .. اللي جا على بالي اننا نحط الكيسة الاولى جوا الكيسة الثانية .. ونحط البرتقالات الخمس بالكيسة الاولى .. فبالتالي (( اجحدوا عاد بالتالي)) كل كيسة فيها خمس برتقالات . ( صحح )
زووم :
مخمختها في مخيخي الأيسر .. وطلع معي أني أحط كيس داخل كيس ومن ثم أحط البرتقالات الخمس فيهم اثنينهم مع بعض . ( صحح )

   
العدد الجاي ...
المحرر: أبو نظارة }

- بتشوفون في الأعداد الجاية :
    * مدمن صرقعه  {
سقطةMBCودعاية قناة وناسه
    * صيت النصر { أصغر نصاب !!
    * المربوش { ورعان الأمس .. أطفال ديجتال اليوم
    * اأنـ؟ـا { خـشم بوش !!
    * مسوي هكر { أهلي مايعرفون للنت
- أعمدة لا تفوتكم :
    * الليدي مزنه { أول ضيوف الزاوية الذهبية !!
    * الزلفاوي { سلسلة الصور الحصرية: لنصب قولدن
    * كريزي { بالصوت: حال العرب
    * زووم { مدري عنها بس كذا علشان نوهقها هههه
 

اللاب توب اللي فاز فيه زلفـاوي وكاتبين عنه أول شي فوووق :يمد:

عزيزي النصاب .. تحس عندك موهبة الكتابة؟

ارسلها لنا..عشان تصير مشهور{ اضغط هنا }

للإقتراحات والتعليقات {اضغط هنا}

  صفحات سابقة : 1 ، 2 ، 3 ، 4 ، 5 ، 6 ، 7 ، 8 ، 9 ، 10 ، 11 ، 12 ، الأخيرة .     
 
منتديات النصابين موقع الإسلام سؤال وجواب موقع الإسلام اليوم
 
 

شات صوتي