phpMyVisites | Open source web analytics phpMyVisites

 

المنتــــــــدى من هـوونا
آخر تحديث : منتصف الشهر الجاري ( ياهو مسرع ) 2008
مهوب إشاعة...
زاوية يكتبها مصدر مسؤول سميك المستوى في كل أسبوع > ملكع

اليوم جاءت رسالة عاجلة للإدارة من الأخ المضروب على عينه ( الحنون ) ماأدري إذا باقي أحد يتذكره ؟ .. يُرجع أسباب غيابه عن المنتدى إلى أنه يخزّن أرقامه السريّة بجواله .. والجوال انسرق .. ويقول بعد أنه يمّر بحالة نفسية من هالحادثة .. لأنه حافظ له صور وهو مصلّع ( يعني بدون شماغ ) داخل الجوال .. وهذي في عاداتهم عيب .. وفيها شق جيب ..  

ناقل الخبر - محسنّ من مكتبة في الدور الثلطّعش
وكالة نصب الإخبارية ( للإشاعات )

 
 
 
الكاتب : عظيم الحب
 تناقضات شريك حياتك

يا الزقرت كلنا ندري ولا يخفى علينا انه فكرة اختيــار شريك الحياه صارت موجوده بمجتمعنا ، وأنا تراني اكبر واحد من ها الناحيه في الاختيارات ولاعب على نص بنات السعوديه ومعشمهم با الزواج <<-- ( خخخ فك القربه ) وصارت البنت تتقبلها وممكن أنها تتزوج واحدن متعرفه عليه عن طريق الحريم أو اي طريقه حقيره ثانية ، والكثير منا مرت عليه سواليف مثل كذا أو قصص حــب على قولتهم ومنتهيه بالزواج  .. أعذارهم هي : أني أختار الشخص اللي أبيه وأعرف وش لي ووش علي من البداية ..
اللي أنا أقوله أن شريك الحياة اللي بهالطريقة كذبه كبيرة وقاعد يمثل حبه العذري ومسوي روحه العاشق الولهان وهو كل همه يلقى شي يسولف فيه عند ربعه
ويفرض سيطرته على البنت بحكم أنه ( فاهم ) في ها الحاله .. يعني الموضوع كله كذبة في هالمجتمع ، ليش نتقبل الفكرة؟ ليش ما نقول أنه عادات هالمجتمع تحتم عليه أنه زوجك يجيك ويتقدم لك من باب بيتكم؟ وتصلين استخاره الله لا يهينتس.. وتشوفين إذا أنتي مرتاحة ولالا؟ ولا بعدك عن ربك وصل لهالحد من البجاحة ؟.. بين السطور ( ترى فيه بنات فاهمات وماأكذب عليكم )<<--- يعننه قال شي محد سمعه .. لازم مانهمشهم ، بس بها الوقت صارت الي عمرها 17ورضاعتها بيدها معلقة معها أربعة ، لا وتقولها لك بكل صراحة : أدوّر اللي أحبه لين الحين موب اللي يحبني ..يعني اللعبة وصلت لمستوى متطور وصارت اختيارات بعد .. اللي أبي أفهمه .. أنت تكون ذكي إذا انثبرت وتساهلت مع تناقضات شريك حياتك وقلت هذا اللي مكتوب ولازم أحاول أني أعدله بقدر ماأقدر ؟ ولا أنك تضيع على نفسك أحلى سنين عمرك برحلة طويلة وكلها كذب وخداع وأنت تدور عن توأم الروح اللي ما راح تلقـاه وتكمل معه بدون ارتباط ؟؟ يعني في النهاية والأخير المسالة مسالة ذكاء وغباء ماهيب أختار ويختار ..

الكاتب : الأستاذ صابر
 الشاعر / جرير رضي الله عنه !

أنا متأكد أنّ 99 بالميّة من الشعب السعودي يعرفون الشاعر جرير .. حتى لو ذكرت لهم اسمه بدون كلمة ( شاعر ) .. ومتأكد أيضاً أن هالتسعة وتستعين بالميّة مايدرون في أي عصر عاش ! هل هو جاهلي ولا عباسي ولا أموي .. أو أنه عاصر الرسول صلى الله عليه وسلم .. وهذا شي طبيعي فمعلوماتنا التاريخية لاتتعدى اللي أخذناه في المدرسة وحفظناه ذيك الأيام عشان الاختبار .. وبعد ماتنتهي الاختبارات لايبقى في أذهانّا إلا الأسماء ..
أما سالفة السيّد جرير - رضي الله عنه وأرضاه - فأثناء تجوّلي في الموقع الغني عن التعريف واللي دايم أحوس فيه الـ
( YouTube ) دخلت على مقطع لقصيدة ناصر الفراعنة - الذي نسأل الله أن يرضى عنّا وعنه -  ناقتي ياناقتي .. وكانوا يتناقشون في الـ ( بوستات ) بشأنها .. وتفاوتت الآراء بين معجب بها ومقلل من قدرها .. فجاء أحدهم مطفّي النور - أَحْسَبُهُ سعوديّ - وقال نصاً / مع احترامي لكل الشعار خالد الفيصل وخلف بن هذال والسامر لاكن والله ماحد يصف مع فرعون الشعر وملك الشعر ناصر الفراعنه اللي المفروض ان قصائدة تصنف مع قصائد كبار شعراء الأمه زي قصائد الصحابي جرير رضي الله عنه والمتنبي .. اهـ .
هذا ورضي الله عن ملكع ومحسن لوكيشن .. وأطال في عمرهما على طاعته ..

- - - - - - - - - - - -


ينعن والديها صافية الصورة

 الكاتب : مقاتل بهراوة  
 إم بي سي فورهم

قالوا لي حط  ( MBC 4 ) في مشرحة النصابين .. وأنا من مبطي منيب هاضمها .. هذي القناة إلى من موجّهة ؟ هل هي لنا ولا للأمريتسان ؟ .. لو تركنا المسلسلات الكوميدية على جمب بحكم أنها حاجة مسليّة لأي شخص أيّا كانت دولته .. وش قصة مسلسل ( 24 ) مع ذا الممثل اللي مسوّي فيها " الخطر معهم " ؟ ( مهيب راكبة صح ؟ ) كل حلقة وهم جايبين مجموعة مسلمين يفجرون ويطاردونهم .. المفروض القناة ماتشتري هالمسلسل المعفّن ..لأنها أولاً تدعمهم وثانياً تساعدهم في نشر فكرة أن المسلمين إرهابيين .. ومن جهة أخرى .. برمانج ( Oprah ) هذي شفت لها حلقة تجيب البنات اللي يكتبون على بطونهم ويحطون حَلَق بألسنتهم وسرّهم .. ماأدري أنا كمواطن عربي وش استفيد يوم أتابعهم ؟ لا وقبل كم أسبوع تقول صوتوا لبوهاما مدري شسمه المرشّح لرئاسة أمريكا .. سلامات يابن فطيس ؟ .. لحد يقول لي لاتتابعهم .. القناة موجّهة للعرب وأكبر دليل أنهم مترجمين برامجها .. واللي قاهرني من جد أن أوبرا برعاية MBC4 الله من قو الدميجة .. أما برنامج الدكتور ( Phil ) وش أقول بس .. هذا اللي صدق حادرن شعيب .. يجيب واحد متهاوش مع خويته لأنّهو لايذهبو برفقتها في المناسبات الرسمية واحد نايم .. المشاكل المطروحة نادراً تلقونها عندنا .. المشاكل الزوجيّة في السعودية وفي الخليج بشكل عام .. سببها أمّا الزوج يسهر برّا ومايجي إلا آخر الليل .. أو أن الحرمة تلعب بالفلوس ولما يقطع عنها زوجها المصروف عشان تعقل تروح تشتكي عليه وتقول ماشفت منه خير أبد .. وهذي المشكلتين بالطبع لن يستطيع حلّها الدكتور فيل مدري ( بهيل ) .

Oprah
هdتراها طاقّة الستين بس السمكرة نفعت معها

dr_phil
شبّها بينهم وقعد يفرّق

MBC 4 \\ n9b.com
 
It's 4 You ( الدليل الثاني )

الكاتب : رئيس التحرير ( عوّد للتتن )
 صندوق بريدنا

ملكع ؟ ماهو غني عن التعريف .. بل فاحش الثراء عن التعريف .. الصورة اللي على اليسار من رسم الفنان : عبد العزيز العتيبي (البريق) .. راسمها بيده الكريمة وملونها باستخدام الألوان الخشبيّة اللي كانوا يعطونّا إياها  فالابتدائية عشان ماتوصخ أدينّا .. أما اللي يمين فهي لخوينا محسن لوكيشن .. وراسمها بالفوتوشوب مجاراة وتحدّي لعبد.العزيز ..

للإجابة على اسعلتنا اضغط على الرابط في الأسفل

 سؤال العدد1 : عندنا خمس برتقالات وكيسين .. نبي نحط في كل كيس خمس برتقالات بنفس الوقت واللحظة بدون مانطلعها من كيس ونحطها بالثاني.. كيف ؟  ( ترى السؤال له إجابة منطقية ) .

سؤال العدد2 : أكمل الفراغ /
150 - ( .... ) = 250

للإجابة على أسئلة العدد أو إرسال مشاركة أووكبس [ هنـاااا ]

الكاتب : راعي مسابقات وسواليف
 إجابات سؤال العدد السابق

سؤال الحلقة الماضية : ماهو الشيء الذي يوجد في الحب مرة واحدة وفي الهدهد مرتين ؟

* الإجابات :
* سهرالليالي : الضمة(’) << اللي هي تسذا  . ( صحح )
* شـ م ـوخ : بالله بالله وش ها السؤال الأستهبالي ..بس أتوقع أنها الضمة لأنها موجودة في الحب مرة وفي الهدهد مرتين . ( صحح )
* الزين بالحيل : بس عرفت الحل .. تراه الجحة  امزح يبو بس ما ودي افضح الجواب خل اللي وراي يتبرجل .. عموما الحل .. الضمة .. ُ ُ ُ ُ ُ ُ <<< عطيتك ستّة منها كم تعطيني من هدهد ( صحح )
* أنـ غيرـا : اتوقع الضمه والشده << لاتقولون غلط ترى ازعل . ( صحح )
* عظيم الحب : اتوقع انه وجه الشبه هو عرف الديتسـ الي على راسه اتوقع انه نفس العرف الي موجود على راس الهدهد والعهدهـ على الراوي
* nayomi :  اعتقد انها الحركة التشكلية الضمة مو الضمة الثانية ( صحح )
* أفلاطون نصب : كلمة حب بالهندي هوب وكذا يصير حرف الهاء مرة وحدة بكلمة هُب ومرتين في هدهد  . ( خطــأ )

نصب بيتنا الثاني بعد المسجد

صفحات سابقة : 1 ، 2 ، 3 ، 4 ، 5 ، 6 ، 7 ، 8 ، 9 ، 10 ، 11 ، الأخيرة .